రెండోరోజు 600దాటిన మరణాలు

తొమ్మిది లక్షలు దాటేసిన క్రియాశీల కేసులు

దిల్లీ: దేశంలో కరోనా కోరలు చాస్తోంది. మహమ్మారి వ్యాప్తి రోజురోజుకు కొత్త రికార్డులను నమోదు చేస్తోంది. గురువారం కేంద్ర ఆరోగ్య మంత్రిత్వశాఖ వెలువరించిన గణాంకాలు ఇంతకు ముందెన్నడూ లేని తీవ్రతను కళ్లకుగడుతున్నాయి. గడిచిన 24 గంటల్లో 12,37,781 మందికి కొవిడ్ నిర్ధారణ పరీక్షలు నిర్వహించగా.. 1,26,789 కొత్త కేసులు వెలుగుచూశాయి. దాంతో మొత్తం కేసుల సంఖ్య 1,29,28,574కి చేరింది. మరోవైపు, క్రియాశీల కేసుల్లో భారీ పెరుగుదల కనిపిస్తోంది. ప్రస్తుతం 9,10,319 మంది వైరస్‌తో బాధపడుతుండగా.. క్రియాశీల రేటు 6.59 శాతానికి చేరింది. 

వరసగా రెండో రోజు కరోనాతో 600మందికి పైగా మృత్యుఒడికి చేరుకున్నారు. నిన్న 685 మంది ప్రాణాలు కోల్పోగా.. మొత్తంగా 1,66,862 మంది బలయ్యారు. ఇంత ఉద్ధృతిలోనూ రికవరీలు కాస్త ఊరటనిస్తున్నాయి. నిన్న 59,258 మంది కొవిడ్ నుంచి కోలుకున్నారు. ఇప్పటి వరకు 1.18కోట్ల మందికి పైగా వైరస్‌ను జయించగా.. రికవరీ రేటు 92.11శాతానికి పడిపోయింది. 

మహారాష్ట్రలో రికార్డు స్థాయి కేసులు..

మహారాష్ట్రలో కరోనా వైరస్ విజృంభిస్తోంది. తాజాగా రికార్డు స్థాయిలో కొత్త కేసులు నమోదయ్యాయి. నిన్న 59,907 మందికి కరోనా సోకగా.. 322 మంది మృత్యుఒడికి చేరుకున్నారు. దాదాపు సగం కేసులు, మరణాలు ఈ ఒక్క రాష్ట్రంలోనే నమోదవుతుండటం తీవ్ర ఆందోళన కలిగిస్తోంది. మొత్తంగా 31,73,261 మందికి వైరస్ సోకగా.. 26,13,627 మంది కోలుకున్నారు. క్రియాశీల కేసులు ఐదు లక్షల మార్కును దాటేశాయి.

తొమ్మిది కోట్ల డోసుల టీకా పంపిణీ ..

దేశవ్యాప్తంగా కరోనా టీకా కార్యక్రమం కింద కేంద్రం ఇప్పటి వరకు 9,01,98,673 డోసులను పంపిణీ చేసింది. నిన్న 29,79,292 మంది టీకా తీసుకొన్నారు. ఈ నెల 11వ తేదీ నుంచి ప్రభుత్వ, ప్రైవేటు ఉద్యోగులకు వారు పనిచేసే చోటే టీకా అందించే కార్యక్రమాన్ని ప్రారంభించాలని కేంద్ర ఆరోగ్య శాఖ రాష్ట్ర ప్రభుత్వాలకు సూచించిన సంగతి తెలిసిందే.