close

Published : 08/04/2021 01:30 IST
Facebook Share Twitter Share WhatsApp Share Telegram Share

మేఘా చమురు డ్రిల్లింగ్‌ రిగ్గులు

దేశీయ పరిజ్ఞానంతో ప్రైవేటు రంగంలో తొలి తయారీ
గుజరాత్‌లోని కల్లోల్‌ క్షేత్రంలో తవ్వకాలకు వినియోగం

ఈనాడు, హైదరాబాద్‌: చమురు తవ్వకాల్లో వినియోగించే డ్రిల్లింగ్‌ రిగ్గులను పూర్తిగా దేశీయ పరిజ్ఞానంతో తయారు చేసిన తొలి ప్రైవేటు రంగ సంస్థగా మేఘా ఇంజినీరింగ్‌ ఇన్‌ఫ్రాస్ట్రక్చర్‌ లిమిటెడ్‌ (ఎంఈఐఎల్‌) అవతరించింది. గుజరాత్‌ రాష్ట్రంలోని కలోల్‌ చమురు క్షేత్రంలో తవ్వకాల కోసం మొదటి డ్రిల్లింగ్‌ రిగ్గును ఓఎన్‌జీసీకి ఈ సంస్థ అందించింది. బుధవారం ఈ రిగ్గుతో తవ్వకాలు ప్రారంభించారు. 1500 హెచ్‌పీ సామర్థ్యం కల ఈ డ్రిల్లింగ్‌ రిగ్గు భూ ఉపరితలం నుంచి 4000 మీటర్ల లోతు వరకు చమురు బావులు తవ్వగలదని, దాదాపు 40 ఏళ్ల పాటు పనిచేస్తుందని ఎంఈఐఎల్‌ ఉపాధ్యక్షుడు రాజేష్‌ రెడ్డి తెలిపారు. అత్యాధునిక హైడ్రాలిక్‌ సాంకేతిక పరిజ్ఞానంతో దీన్ని తయారు చేసినట్లు, విద్యుత్తు కూడా పొదుపుగా వినియోగిస్తుందని వివరించారు.

47 రిగ్గులకు రూ.6000 కోట్లు
ప్రభుత్వ రంగ సంస్థ అయిన ఓఎన్‌జీసీ కి 47 డ్రిల్లింగ్‌ రిగ్గులు సరఫరా చేసే కాంట్రాక్టును 2019లో ఎంఈఐఎల్‌ సొంతం చేసుకుంది. ఈ కాంట్రాక్టు విలువ రూ.6,000 కోట్లు. ఇందులో భాగంగా తొలి రిగ్గును ఎంఈఐఎల్‌ తాజాగా ఓఎన్‌జీసీకి అందించింది. దాంతో కలోల్‌ చమురు క్షేత్రంలో తవ్వకాలు ప్రారంభించారు. మిగిలిన 46 రిగ్గుల తయారీ వివిధ దశల్లో ఉన్నట్లు ఎంఈఐఎల్‌ పేర్కొంది. ప్రైవేటు రంగంలో ఇంత భారీగా రిగ్గుల తయారీ చేపట్టడం ఒక రికార్డుగా సంస్థ పేర్కొంది. ఓఎన్‌జీసీకి సరఫరా చేయాల్సిన 47 రిగ్గుల్లో, 20 వర్కోవర్‌ రిగ్గులు. ఇప్పటికే తవ్విన చమురు క్షేత్రాల్లో మిగిలిపోయిన నిక్షేపాలను సైతం వెలికి తీయడానికి వర్కోవర్‌ రిగ్గులు అవసరం. సాధారణ రిగ్గులు ఈ పనిచేయలేవు. ఓఎన్‌జీసీకి అందించాల్సిన  మిగతా రిగ్గుల్లో రెండు రాజమండ్రి చమురు క్షేత్రంలో అసెంబ్లింగ్‌ దశలో ఉన్నాయి. మిగిలిన రిగ్గులను తమిళనాడు, త్రిపుర, అస్సాం రాష్ట్రాల్లో ఓఎన్‌జీసీకి చమురు క్షేత్రాలు ఉన్న చోట అందించాల్సి ఉంది.

చమురు డ్రిల్లింగ్‌ రిగ్గుల కోసం ఇంతకాలం మనం ఇతరదేశాలపై ఆధారపడవలసి వచ్చిందని, ఇకపై ఆ అవసరం లేదని రాజేష్‌ రెడ్డి వివరించారు. చమురు బావుల తవ్వకాల్లో వినియోగించే అత్యాధునిక సాంకేతిక పరిజ్ఞానాన్ని మనదేశంలో అందుబాటులోకి తీసుకువచ్చే దిశగా తాము ముందుకు సాగుతున్నామని తెలిపారు.

Tags :

మరిన్ని

మీ ప్రశ్న

సిరి జవాబులు

మరిన్ని
తాజా వార్తలు
మరిన్ని